واحنا فايتين ع الحدود

أغنية الحدود - فرقة الأصدقاء
حنان ماضي
منى عبد الغني
علاء عبد الخالق
فرقة لذيذة كان عاملها عمار الشريعي و عملوا تلات البومات في تلات سنين
الأغنية دي من أشهر اغانيهم

واحنا فايتين ع الحدود
مستمرين فى الصعود
اختفى النيل الجميل من تحتنا
والمدن والريف وأول عمرنا
وابتدى شئ ينجرح جوه الوجود
وابتدينا أسئلة مالهاش ردود
ميلنا على الشباك نخبى
دمعة فرت مننا
*
بصة م الشباك على البحر البعيد
واحنا رايحين بالآمال عالم جديد
كنت فاكرة يا مصر انى تعبت منك
واكتشفت انى محال استغنى عنك
حتى دوشة صوت جيراني
والزحام وحشونى تاني
بسمة حلوة لطفلة لسه صغيرة
لما كنت اديها حتة سكرة
قبل ما نسيبك
وحشتينا يا مصر يا أمنا
*
كنت باتذكر ॥ وأنا فى غاية الأسى
لعبنا الكورة فى حوش المدرسة
والشقاوة واحنا لسه صغيرين
والبراءة والصحاب الطيبين
لما سألتنى اللى جنبي
انت مصرى ؟ دق قلبى
اسم زى السحر رفرف علي المكان
زى نسمة مهفهفة بصوت الآدان
أيوه مصريين لآخر كل نقطة فى دمنا
*
في وجوه من تلج وعيون من إزاز
شوقى زاد للعشرة والناس العزاز
وابتديت اكتب وأنا فوق السحاب
ابتديت يا حبيبي في أول جواب
مصر إنتى حته منى
مش مجرد اسم وطنى
قالوا فاضل نص ساعة على الوصول
قولت ايه معنى الساعات ولا الفصول
إلا فى الارض اللى فيها ذكرياتنا وحبنا
وابتدى شئ ينجرح جوه الوجود
وابتدينا أسئلة مالهاش ردود
ميلنا ع الشباك نخبى دمعة فرت مننا