عيل شقي
ديك في المنام بيفـَوَّقه
فيقوم نشيط
ويقول : يا شمس
خلاص صحيت
يلا اشرقي
عيل شقي
عيل بريء
يفرح قوي بْلمسة حنان
وبكلمتين مايْكـَلـِّفـُوش
لكنهم م القلب
بلسم : يلمس الأحزان : تبوش
يضحك ؛
فتبدر ضحكته بسمة
على كل الوشوش
يبكي : براح الكون يضيق
عيل بريء
عيل نبيه ...
أشطر صحابه
يشبه أبوه أيام صباه
ويغلبه أيام شبابه
أصعب سؤال
- من قبل حتى ما يتنطق -
يعرف جوابه
- وبدون كلام -
تقرا الإجابة من عنيه
عيل جميل ...
أجمل من امه
رغم انها ...
...........
....
مش هقدر احكي عنــَّـها
لكن جمالها سحر جاري
جوا دمه
لو حرف طار من لدغته
تجري القلوب علشان تـِلـِمُّه
واما بيمشي : الأرض تصبح حضن دافي
؛ عشان تضمه
والنجمة فوق راسه تميل
عيل جميل
مش قادر احكيلك عليه
واوصف جمال ملهوش عدد
من غير ماقوللك غبتي ليه؟!
من قبل حتى ما يتولد !!!
هناك 14 تعليقًا:
يا إسلام بما ان القصيدة عامية فهرد عليك باللهجة العامية. طبعا أنا أول واحد يعلق و ليه الشرف.عايز اقولك ان انا أحيانا بيتحبس الكلام جواية و مش بقدر اترجمه الفاظ لأن مفيش لفظ ممكن يدل على المعني أنا قدام الحالة دي دلوقتي و كل اللي ممكن اقولك اني أدعيلك بدعاء العز بن عبد السلام " اللهن ان في جسد هذا العبد مضغة تهفو لإلف لها في غير معصيتك فاجمع بينهما على خير" محدش عارف بكرة فيه ايه و احتمال كبير ابنك يكون ابنك و ابنها حقيقي مش مجرد فكرة تايهة على الورق.
طبعا القصيدة من الناحية الفنية عالية و انا مبسوط انك بدأت تقرب من فكر الناس و تبعد عن التعقيد اللي مش بيهم غير النقاد.كمان الحبكة جميلة في النص و النهاية بتفجر مفاجأة كبيرة تخلي اللي بيقرأ بيشد في شعره منك عشان ضحكت عليه طول القصيدة.
تحياتي ليك و آسف لو كنت رغاي.
أخوك / أحمد الزيات.
والله يا اسلام الواحد هو اللى بيقى عيل لما بيقرأ أشعارك وقصائدك علشان مبيباش عارف يقولك ايه.
انا بصراحة مش عارف اقول ايه غير ربنا يوفقك دايما يارب والى الأمام دائما.
أخوك محمد على البلاط
ما شاء الله يا اسلام طبعا انت مش محتاج كلام من واحد زي لكن انا حبيت اهنيك علي القصيدة الجميلة بكلماتها ومفرداتها اللي فعلا نقلتي لجو تاني
بجد يا اسلام القصيدة رائعه من روائعك.
وانا برسلك سلام أحمد حراز وياريت ترسل سلامي لـ(أحمد ابو النجاه)
مع تحيتي
اخوك
حسام الكردي
جامدة أوي يا اسلام
اكتر حاجة قريتها وحسيتها ليك
ربنا يفتح عليك
جميلة وبسيطة فكرتني بأسلوب شاعر أسمه دكتور محمد أيمن جمال ليه ديوان أسمه مسافر في العيون السود بس بصراحة كان رائع رغم اللغة العامية ألا إنه كان مبدع في توصيل هدفه من القصيدة زي مأنت عملت في قصيدتك.
أستمر وربنا يوفقك
أما النص
فالثاني على التوالي
بالعامية المصرية
و لا أدري هل خاصمت حالتك الراهنة فصحاك؟
أم أنها رسائل لمن تحب أن تخاطبها بلسانها؟
و أما الصور
فتحف فنية
و اما قفل المقاطع
فمغبوط عليه عدد حروفه
و أما الطفل
فأنت و منيتي أن يشبهك لا يشبهها
(بالطبع إن كان ذكرا
أما إن كانت أنثى فلا
لا نريد أن نزيد العوانس عانس
- مجرد دعابة - )
و أما شوقك لها
فقلمك يعلمه
و أما شوقي أنا لك
فربك يعلمه
( طاووس في حضرتكم يلم مفرود ريشاته )
أبناؤنا الذين حلمنا بهم : وأدتـِهم دون أن يولدوا ، وشردتـِهم دون أن يوجدوا ، وإن كانت جريمة الوأد والتشريد تستحق العقاب والتجريم ؛ فإنني بريء منهما دونك ، لكنني شريك متورط في جريمة الحلم ، وعقابي ألا يتحقق الحلم ، أو مكافأتي ألا يأتي الحلم مشوها .
عيل صغير يشبهك
مش قادر احكيلك عليه
واوصف جمال ملهوش عدد
من غير ماقوللك غبتي ليه؟!
من قبل حتى ما يتولد !!!
أعتقد أنك لم تدع لعقدة الذنب فرصة للهرب !
فإن لم تشعر بالذنب على تشريد الأبناء
تشعر بعقدة ذنب قتل البراءة والنباهة والجمال والشقاوة
ندمتها على حبيبها
وأطفالها التى حلمت بهم
وعلى أشياء أخرى كثيرة
وإنى أظنك مراوغا - وهى لفظة أكثر شياكة من ألفاظ أخرى - عندما تقول :
ولن أقبل فيك مواساة أو عزاء لأنك جانية تستحق العقاب الذي لن يكون على يديّ ،، يداي تمهدان الطريق لآخرين يستحقون عناء الإشارة ، انتظاري لهم مكافأة لقلبي الطيب ، وقلبي الطيب مكافأة لهم ..
فا هى يداك لا تكتفى بالعقاب بل تخطاه إلى القتل !
أصعب سؤال
- من قبل حتى ما يتنطق -
يعرف جوابه
- وبدون كلام -
تقرا الإجابة من عنيه
ياله من صمت عبقرى !
من غير ماقوللك غبتي ليه؟!
من قبل حتى ما يتولد !!!
نهاية صادمة
الموسيقى فى النص خفيفة ، تلقائية ، مرنة ، أعتقد أنها مادة طيعة فى أيدى الملحنين تفتح آفاقا موسيقية أمامهم
أخوك المحب / أحمد داود
جميله ماشاء الله كما عهدت منك,,
ويقول : يا شمس
خلاص صحيت
يلا اشرقي
:)
من غير ماقوللك غبتي ليه؟!
من قبل حتى ما يتولد !!!
--وتظل الدنيا علي حالها تحمل من المفاجأت الكثير--
ايه ياد الفتوح والتجلى اللى انت فيه ده كله ؟:)
إسلام!
ماكنتش اعرف انك بتكتب عامي بجد بالقوة دي :)
سعيدة اني قريتها جدا
وتقريبا سمعتها بتتدندن :))
عيل بريء
يفرح قوي بْلمسة حنان
وبكلمتين مايْكـَلـِّفـُوش
لكنهم م القلب
بلسم : يلمس الأحزان : تبوش
يضحك ؛
فتبدر ضحكته بسمة
على كل الوشوش
يبكي : براح الكون يضيق
عيل بريء
انا عايز من دة
بد قصيدة جميلة و مترجمة احاسيس كتير الواحد لما بيجى يتكلم عنها مش بيعرف يوصفها
اسف نسيت الامضاء
الفنان العالمى (كتاية و تلحين و رسم و شوية حاجات تانية كدة)
السيد هجرس
إرسال تعليق